يوميات بو صلوح الكويتي (2)

بو صلوح دخل الكلية و طبعا كشخ أول يوم بالتريننغ سوت بو خطين و نزل الكبوس على العين و ما كان باقي شي و يحوش خشمه ، و أول ما دخل من باب الكلية المقابل لنادي الكويت عرف ان الخيرة في ما اختاره الله ما انقالت عبث خصوصا بعد ما شاف اللي طلعو من حجز ال(45) يوم بالكلية العسكرية ، و بعد ما سرح اب هالكلمتين صحا على المناظر اللي احبها قلبه حجاب بو قوطي روب و غتره أم علاق و باجي عدة الزقرتيه المعروفة ، و حس ان دخل الجو بسرعة و حب الحياة الجامعية وايد بس بعد ما انتها الكورس الأول ، و طلعت النتايج اللي اتسود الويه رجع الى الواقع المرير و بدى يدور على الحلول الفطينة اياها ، بس هالمرة الوضع كان أصعب و بعد ما فقد الأمل و انذار ورا انذار صار اللي ما تحمد عقباه و انطرد بو صلوح من الجامعة ، و بعد ما انطرد ظل فترة بطالي بس أبوه ما كان راظي على الوظع كلللش و امسمعه كلمتين بالعظم بالروحة و اليية ، و بعد عناء رظخ بو صلوح للظغط و التحق بدوره خاصه سمع انها سهله و الكل اتخرج منها و الدوام فلاتي ، و بعد سنتين تخرج و الحين صار لازم ادور وظيفة تليق اب مقامه الرفيع ، و طبعا كان أهم شي بعد المعاش ان الدوام اكون فلاتي ، لأن المسكين عمره ما داوم مثل الأوادم فما ينلام ، و الصدفه تلعب دورها و يتلاقى اب واحد من ربع القهوه اياهم ، فبعد ما سولفوا و عرف مشكلة بو صلوح اقترح عليه ان اتوظف بالبلدية و طبعا الموظوع يحتاج واسطة قوية ، فراح بو صلوح حق أحد النواب المشهورين اب تقديمهم مثل هذي الخدمات بالدائرة السادسة كونه مقيد فيها كناخب ، فراح بو صلوح الى المكتب الخاص لمثل هذي المعاملات و أول ما دش هلو و رحبو فيه ترحيب حار و قهووه ، خذو المعامله و وعدوه خير، و قبل لا يمشي وقف جدام السكرتير و طلع بوكه بحاسب الريال مقابل الخدمة بس السكرتير مسك ايده و قاله رجع بوكك يا ولد ما نبي منك الا الدعاء و بس أحب أذكرك ان صوتك أمانه........يتبع